🔸守時

都市人工作忙碌，有時需要OT有時不幸遇到大塞車，搞到有些少遲到都係可以被理解的~ 但如果每次都習慣搭正/遲小小先入課室，大家開始哂上堂先手忙腳亂舖墊拎磚，就會好打擾到其他同學嘅專注練習。

預早時間到達換衫、進入課室係對自己同對老師嘅尊重，大約早10分鐘到studio係最理想嘅時間，咁就可以有足夠時間整理自己嘅身心去準備上課，亦唔會miss左好重要嘅熱身環節。

另外，如果好早就知道自己會需要遲到早退/缺席，同老師講翻聲以示禮貌就更好啦~

🔸用品擺放整齊

進入studio後，將除好嘅鞋擺放整齊，可以避免其他同學踩到/kick到。落雨天就將用過嘅遮放入遮架，進入課室就將個人物品放好入櫃，如非必要，手機/貴重物品都最好放哂入袋收好。

課堂結束後，就將使用過嘅瑜伽用品清潔好，然後放翻原位。一個整潔安全嘅練習空間需要靠大家一齊打造，物品擺放整齊更能體現個人修養。

🔸保持安靜

瑜伽係一種需要內在專注同寧靜環境嘅練習，任何突如其來嘅聲響或打擾都可能會破壞寧靜，影響大家嘅課堂練習。

喺需要安靜嘅時候私下交談，可能會令其他同學分心，專注唔到/聽唔清楚老師嘅指令。所以無論係等候上課期間定係課堂進行中，除非有緊急事需要溝通，都盡量保持安靜，有任何問題都可以留翻落堂後同老師/同學慢慢討論~

講到口臭~但都要再提醒同學們上課前唔好忘記將手機調教至靜音/飛航模式~

🔸穿着合適服裝

上瑜伽堂會做好多各種伸展動作，選擇合身、彈性好嘅運動服就可以盡情自如做動作，老師又可以容易睇到同學需要調整嘅地方。穿着太緊或太鬆嘅服裝如裇衫/短裙，都會令自己唔舒服，好難專注喺課堂練習。

🔸尊重他人空間

每張瑜伽墊都係屬於每位練習者嘅個入空間，上課練習期間要對空間有覺知，唔好隨便’侵犯’到人地練習嘅空間。如果唔小心踩到，可以輕聲表達歉意。

瑜伽禮儀唔止得以上5點，但都離不開做好本份、互相禮讓嘅宗旨。瑜伽係一場修行，學懂瑜伽禮儀，將心比心為彼此著想，一齊做受人尊重嘅瑜伽練習者，令到瑜伽變得更有意義🤎

Namaste🙏🏻